आईकरिता शोक

केशवसुत

 

अंतरले पाय तुझे हाय हाय माते !

मागे तव दर्शन मजलागुनी जहाले,

तदनंतर लोटुनिया दिवस फार गेले;

फिरूनि तुझ्या चरणांते

उत्सुक मी बघण्याते

असता,अंतीहि न ते

दिसले की अहह ! पूर येत लोचनाते ॥

फिरूनि तुझे कोठे ते तीर्थरूप पाहू !

पादरजी लोळूनि तव धन्य केवि होऊ !

जनकामागे जागृत

जननी गे ! तू दैवत

उरलिस, तीही साम्प्रत

गेलिस सोडुनि आम्हा दीन बालकांते ॥

कठिण जगी या बघती छिद्र काक सारे,

करूणेचे कोठेही नसे लेश वारे !

तुझ्यासवे क्षमा दया

प्रीतिही गेली विलया !

मदपराध घालुनिया

पोटी नुरल्ले कोणी प्रेम करायाते ॥

कष्ट दिले तुजला मी फार फार आई !

त्यांची मजकडुनि फेड जाहली न काही !

दुर्भग मी असा असे

म्हणुनि दुःख वाटतसे,

कठ फार दाटतसे,

रडतो गुडघ्यांत म्हणुनि घालुनी शिराते ॥

#Tuze nav mukhi  #Keshavsut  #केशवसुत  #मराठी कविता